La enfermedá del coronavirus 2019 (COVID-19), tamién conocida como enfermedá respiratoria aguda nCoV 2019, ye una enfermedá infeiciosa causada por SARS-CoV-2 (enantes conocida como coronavirus nuevu 2019 o virus de Wuhan), un virus estrechamente rellacionáu col SARS Co-V. La enfermedá descubrióse cola epidemia de neumonía por coronavirus de Wuhan de 2019-2020. El mou principal d'infeición n'humanos ye la tresmisión de persona a persona, que se produz davezu al traviés de gotes que surden de les víes respiratories d'individuos infeutaos que tusen, estornuden o exhalen. Tien un periodu d'incubación d'ente 2 y 14 díes. La tresmisió pue amenorgase llimpiando bien les manes con una bona hixene en xeneral. Nun primer momentu, la enfermedá pue presentase asintomática o con pocos síntomes, o pue apaecer fiebre, tos, dificultá respiratoria, dolor nos músculos y cansanciu. Cuando ta más desenvuelta apaez una neumonía, síndrome de dificultá respiratoria aguda y muerte. Nun hai vacunes nin tratamientos efectivos y los esfuercios céntrense normalmente na xestión de los síntomes y midíes d'apoyu. La Organización Mundial de la Salú (OMS) y los Centros pal Control y Prevención d'Enfermedaes (CDC) recomienden que les persones que sospechen ser portadores del virus lleven una mázcara facial quirúrxica y que pidan asesoramientu llamando al médicu en cuenta de visitar direutamente una clínica. La OMS tien declarao que'l brote de coronavirus 2019-2020 ye una emerxencia sanitaria de preocupación internacional (PHEIC).
© MMXXIII Rich X Search. We shall prevail. All rights reserved. Rich X Search